Nagpanawagan iti sumagmamano a labor groups nga agikkaten iti puesto ni Baguio City Mayor Benjamin Magalong kalpasan a dinutokan isuna ni President Ferdinand Marcos Jr. nga special adviser ken investigator iti nabukel nga Independent Commission for Infrastructure (ICI) a mangtutuk kadagiti kaso nga adda pakainaigan iti korapsyon kadagiti proyekto maipanggep ti imprastraktura iti gobierno iti napalabas a sangapulo a tawen.
Segun ti Nagkaisa Labor Coalition, numan pay ammodan ti integridad ken dedikasyon ni Magalong ket saan a rumbeng nga agiddan ti akemna kas mayor ken panagbalin nga imbestigador iti ICI.
Kinuna ti grupo a mabalin nga agtalinaed nga adviser wenno full-time investigator ni Magalong isu a rumbeng nga agikkat kas mayor.
Pinasingkedan pay ti grupo ti Section 7, Article IX-B ti 1987 Constitution a mangiparit kadagiti elected officials a mangdutok iti sabali a posisyon iti gobierno bayat nga adda iti termino a pinatibker iti Korte Supremana iti kaso a Flores V. Drilon idi 1993.
