VIGAN CITY – Patien iti maysa a nalatak a boxing analyst a napintas a pannubok para ken ni fighting sen. Manny Pacquiao iti umadanin a laban da kenni Keith Thurman inton July 21.
Segun ken ni Quinito Henson iti eksklusibo a pannaki-uman ti Bombo Radyo Vigan kenkuana, marukod iti kabaelan ken laing ni Pacquiao kontra iti naub-ubing kenkuana a ni Thurman nga akin-iggem ti WBA Super welterweight title.
Uray nu saan a maipagpannakkel iti inpakita ni Thurman iti naudi a tallo a laban na, inbaga ni Henson a sigurado nga ipapati ti undefeated boxer iti performance na iti laban da kenni Pacquiao.
Nu pay kasta, inbaga na nga uray nu kasanu iti panangipapati ti American boxing champ iti laban da inton July 21, sigurado a nakasagana met ti Pinoy ring icon a makisinnabay iti performance iti kalaban na ken ikagumaan na iti mangabak.
