VIGAN CITY – Naipaagas iti ospital dagiti nagkalubbon iti motorsiklo ken ti nagmaneho iti kurong-kurong gapu ti panagdinnungpar dagiti luganda idiay Barangay Quimmarayan, Sto. Domingo.
Nabigbig ti nagmaneho iti motorsiklo a ni Frederick Tabasan, agtawen iti duapulo ket lima ken ti backride-na a ni Maricar Tiri, agtawen iti sangapulo ket siam nga agpada a taga-Barangay Laoingen, Sto. Domingo idinto a ti nagmaneho iti kurong-kurong ket maysa a menor de edad, grade 10 student a taga-Barangay Quimmarayan, iti nasao nga ili.
Agpapa-amianan ti motorsiklo idin ta inovertake-anna ti maysa a sedan car ket saanna a nadlaw ti sumungsungad a kurong-kurong iti bangir a linya nga awan ti head light isu a napasamak ti panagdinnungpar.
Gapu dayta, nadunor dagiti karaman iti nasao nga aksidente nga agpapada a naipaagas iti ospital.
