VIGAN CITY – Inlawlawag ni National Movement for Free Elections (NAMFREL) national chairman Gus Lagman a saan na a kukuwestyunaran iti kredibilidad iti resulta ti napalabas a May 13 midterm elections gapu ti nausar nga automated system.
Ngem segun ken ni Lagman, narisrisgo iti panagswitik iti automated elections ta adda ti software nga isimpa ti manufacturer a posible nga isu iti pakapasamakan dagiti adu nga iregularidad ken panagswitikan.
Immunan nga inbaga ti nasao nga opisyal a napinpintas nu maisubli ti manual elections, nangruna iti manual counting kadagiti polling precincts tapnu maliklikan iti pannakaswitik iti resulta ken tapnu maliklikan dagiti adu nga aberya kas iti nagpalya a vote counting machine ken na-corrupt nga SD card.
Maipalagip a nabiyag iti tarigagay dagiti election watchdog ditoy pagilian a maisubli iti manual elections gapu ti inbilin ni Presidente Rodrigo Duterte iti opisina ti Commission on Elections (Comelec) nga agsapul da laengen iti sabali a kompanya a mangsukat iti serbisyo ti Smartmatic gapu kadagiti adu a reklamo a naawat na.
