Nakaru ti dadael dagiti dua a lugan gapu iti aksidente a nakairamananda iti national highway idiay Barangay Paratong, Sta. Cruz.
Ti nagmaneho ti Mitsubishi Canter closed van ket ni Melchor Pinto Valderam, agtawen iti tallopulo ket walo, driver, holder iti driver’s license nga agnaed idiay Barangay Cacandongan, San Juan idinto a ti nagmaneho ti Toyota Vios ket ni Makuachukwu Courage Nwokoma, Nigerian National, agtawen iti duapulo ket walo agnaed iti agdama idiay Parañaque City a holder iti International Driver’s license, kaduana ti nobyana a Pilipina.
Iti pannaki-uman ti Bombo Radyo Vigan ken ni PMaj. Vincent Tadeo manipod Sta. Cruz Municipal Police Station, agturong ti closed van iti bagatan a direksyon idinto a ti kotse ket adda iti bangir a paset iti kalsada.
Segun ken ni Tadeo, ti kotse ket immagaw iti linya ti closed van ta inovertake-anna ti lugan iti sangona ket impadas ti closed van a limmiklik iti panagdinnungparda ngem naawanan ti kontrol ti manibela ti driver isu a naidungpar iti kongkreto nga alad ket nakadinungparna latta iti kotse.
Nupay nakarau iti nadadael a paset dagiti dua a lugan ket saan a naan-ano dagiti driver ngem naipanda latta iti Ilocos Sur District Hospital – Sta. Lucia.
Kabayatanna, ingkari ti Nigerian National nga isu ti aggastos iti amin a pagpatarimaan dagiti nadadael a paset ti closed van ta aminado nga isu iti akimbasol iti aksidente.
