Imbasura ti Korte Suprema ti reklamo ti Commission on Human Rights (CHR) kontra ti dadduma a polis idiay Tondo, Manila iti mainanaig iti mapapati a secret detention cells.
Iti pangngeddeng ni Associate Justice Antonio Kho Jr., pinatibker iti SC Second Division ti dismissal ti Office of the Ombudsman ti reklamo ti CHR iti mapapati a secret detention cell iti uneg ti Raxabago Police Station 1.
Maibasar iti video a naipasa idi iti CHR ket nakita ti tallo a lallaki ken siam a babai iti nagsisinneksek iti bassit ken narugit a kuarto nga adda iti likod ti kayo a bookshelf.
Iti biang dagiti polis, nakapasar ti overcrowding iti pagbaludan kadagita a panawen ta siam a pulo ket innem iti naka-detain uray limapulo a detainees laeng koma iti malaonna.
Gapu dayta ket napilitanda nga agaramat ti temporary holding area bayat nga ur-urayenda nga aggaraw iti imbestigasyon dagiti nakabalud.
Segun ti Supreme Court, awan ti ebidensya nga adda secret detebntion cell wenno panaglabsing ti Anti-Torture Act of 2009.
Kinuna ni Korte a rumbeng a tignayan dagiti ahensya ti gobierno ti pagkurangan ti nadalus ken husto a pasilidad kadagiti pagbaludan.
Napalagipan pay dagiti polis a rumbeng a pagtalinaeden a nadalus uray iti temporary holding areas nga ar-aramaten dagiti detainee.
