Nagballaag ti Department of Budget and Management (DBM) kadagiti supplier iti gobierno a saan a makalusot kadagiti maanomalya a bidding schemes iti salinong ti New Government Procurement Act (NGPA).
Segun ti DBM, saan nga epektibo iti palit ulo scheme, panagsukat ti nagan ken panagaramat ti dummy owners gapu iti baro a linteg a mangiyetnag iti napudno, patas ken transparent a public procurement.
Maysa kadagiti probisyon ti NGPA ti mandatory disclosure ti beneficial ownership information, a kasapulan nga ipakaammo dagiti kompania a mairaman iti bidding ti pudno nga akin-kukua wenno siasinoman ti akin-kontrol ti operasyonda tapno maliklikan ti conflict of interest ken korapsyon.
Maibasar ti listaan ti Government Procurement Policy Board- Technical Support Office, nasurok innem a pulo ket lima a porsiento ti bidders ket adda agpapada nga akin-kukua idinto a pitopulo ket maysa a porsiento met iti konektado nga opisyal iti gobierno.
Pammeneknek dayta a kasapulan iti naing-inget a panagadal ti bidding.
Kabayatanna, kasapulan payen ti agipasa ti beneficial ownership information dagiti kompania iti Philippine Government Electronic Procurement System (PhilGEPS) para iti Platinum registration a requirement iti pannakipaset ti bidding.
