Matratar inton sumaruno a lawas dagiti kontrobersial a nagan a mainaig iti maipagarup a maanomalya a panagaramat ni Vice President Sara Duterte iti confidential funds ken intelligence funds.
Pakairamanan daytoy ti Mary Grace Piattos, Milky Sikuya, ken dadduma pay a nagan nga immunan a rimmuar idi inimbestigaran ti House Committee on Public Accountability and Good Government ti intelligence fund ti bise presidente.
Segun ken ni House Prosecutor Terry Ridon, amin a nagan a maipagarup a nagserbi a recipient wenno nakaawat iti intel fund ket posible a rumuar manen iti panangtratar ti nadakamat a pondo a nakaipalaon iti Article I ti Articles of Impeachment.
Plano ti panel nga ibaga amin a report ti Philippine Statistics Authority a mangpaneknek no adda dagiti rekord para kadagiti nadakamat a nagan.
