VIGAN CITY – Im-imbestigaran dagiti pannakabagi ti linteg ti Santiago ti napasamak a panagtakawan ti maysa a resort idiay Brgy. San Roque, Santiago.
Naala kadagiti biktima a da Romeo Tan nga agtawen ti innem a pulo, maysa a konsehal iti ili ti Sta. Maria ken ni Mila Tan, agtawen ti tallopulo ket walo nga agpada nga agnaed idiay Poblacion, Sta. Maria ti maysa nga Iphone 11 a cellphone, shoulder bag a naglaon kadagiti alahas nga aggatad ti uppat a gasut limapulo a ribo a pisos ken sangapulo ket innem pito a gasut a ribo a pisos a kuarta.
Segun ken ni Police Master Sergeant Dennis Pascua ti Santiago PNP, nalipatan nga in-lock dagiti biktima iti arwangan ti inabanganda a kwarto ket idi nakariingda, naduktalanda laengen nga awanen dagiti nasao nga alikamen ken kuarta.
Adda iti agbanbantay iti nasao a resort ngem naikaridep isu a saanna a nasiputan dagiti suspek ken madama a matartarimaan iti alad ti resort a posible nga isu iti simrekan dagiti suspek.
