Dead on arrival ti maysa a konsehal a pinaltugan ti riding-in-tandem idiay Barangay Tamag, Vigan City, Ilocos Sur.
Nabigbig ti biktima a ni Sangguniang Bayan Member Anthony Verzola, taga-Barangay Callaguip, Caoayan.
Iti pannaki-uman ti Bombo Radyo Vigan ken ni PLT. Amado Somera, nakatugaw iti maysa a panganan ti biktima idin ta pinaputukan ti riding-in-tandem iti naminsan a daras a nakapuntaan ti ulona.
Segun kadagiti witness, nakitada dagiti suspek nga agkarasubli iti lugar agingga nga idi adda idiay ti biktima ket ginundawayanda a papatayen.
Maibasar iti inisyal nga imbestigasyon, awan met ti pangta iti biagna ti biktima.
Agtultuloy ti panangkita dagiti pannakabagi ti linteg kadagiti CCTV footage tapno maamuan no nagturongan dagiti suspek, kasta payen ti panangduktalda no ania ti motibo ti pammaltog.
