Mapatta-patta nga umabot iti 7.5 milion a pamilia a Pilipino ti makaawat iti tulong pinansial iti salinong ti Unified Package for Livelihoods, Industry, Food, and Transport Assistance Program nga inrusat ni Presidente Ferdinand Marcos Jr.
Segun ken ni Marikina 2nd District Rep. Miro Quimbo, chairman ti House Ad Hoc Committee on Legislative Energy and Development, katukad ti UPLIFT dagiti addang nga intal-o ti Kamara tapno maksayan ti epekto ti panagpangina ti presio dagiti kangrunaan a magatang babaen iti target nga ayuda ken dadduma pay a reporma.
Iti salinong ti programa, umawat iti maminsan a daras a P2,000 ti 3.5 milion a benepisyaryo ti 4Ps ken Walang Gutom Program.
Kabayatanna, ti met 2.5 milion a marigrigat ken near-poor a pamilia ken 1.5 milion a low-income workers ket makaawat iti P2,000 kada bulan manipud Hulyo agingga Disyembre 2026 kas mayataday iti naituding a patakaran.
