Nagpanawagan ni AGRI Partylist Rep. Wilbert Lee iti Department of Health tapno mangirusat iti national task force kontra mpox iti baet ti ngumatngato a bilang dagiti makapkaptan iti nasao a sakit.
Segun ken ni Lee, kangrunaan a mandato ti task force a bantayan ken idaulwan dagiti lokal a gobierno ti panangipatungpal iti mekanismo tapno malapdan ti panagraira ti mpox.
Innayon ni Lee a makatulong pay iti epektibo a panangparmek iti mpox ti pannakaaramat dagiti nasursuro idi Covid19 pandemic, ken nasken a saan nga agpakampante ta daytoy a sakit ket kasapulanna ti panagtitinnulong ti intero a pagilian.
Kiniddaw pay ti kongresista iti DOH ken Philhealth a maaddaan iti komprehensibo nga information campaign mainaig iti mpox ken dagiti benepisyo a sungsungbatan ti ahensia iti panangagas iti mpox ken dadduma pay a makaakar a sakit.
