VIGAN CITY – Saan nga agbaliw iti desisyon ni Buhay Partylist Rep. Lito Atienza iti panangkontra na ti maidurduron a pannakaisubli ti dusa a bitay ditoy pagilian.
Dayta ket uray ibagbaga ti kaaduan nga inton 18th Congress ket maaprubaranen ti nasao a gakat ta adu a baro a senador a mangbukel iti maaw-awagan a supermajority ti Senado iti pabor iti singasing.
Ti pannaki-uman ti Bombo Radyo Vigan ken ni Atienza, naibaga na a ti dusa a bitay ket mangpakaro laeng iti kinadamsak ditoy pagilian ket nu maaprubaran, posible a mairuwam ton dagiti tattao nga adda inaldaw a matmatay gapu ti dusa a bitay.
Mainaig dayta, inallukoy na dagiti pada na nga agpanpanday linteg a ti laengen tutukan da ket iti panangpapintas iti justice system iti pagilian ken ti pannakakemmeg dagiti pudno a kriminal kas kadagiti bigtime drug lords ken dadduma pay a poon iti kinadamsak.
