VIGAN CITY – Impakaammo ni SSS Vigan Branch Head Cecille Sally a dagiti mapan agbayad iti opisinada ket adda iti number coding a masursurot ken malimitaran ti bilang dagiti umuneg iti opisina.
Segun ken ni Sally, maikkan iti numero ti tunggal maysa ket kunana a limapulo a kliyente laeng iti akomodarenda iti tunggal oras.
Dagiti addaan iti numero manipud iti 1 agingga 60 ket isuda iti maserbian iti oras ti alas otso agingga alas nuebe iti agsapa idinto a dagiti addaan iti numero a 61 agingga 100 ket isuda met ti maserbian iti oras ti alas dyes agingga iti alas onse iti agsapa tapno saanda unay a marigatan a makipilpila.
Innayonna pay a no nakaalada iti numerodan ket mabalinda pay laeng a mapan kadagiti gagarada ta mabalin nga agsublidanto laengen no dumteng ti oras nga isudan ti maserbian.
Kabayatanna, adda iti drop boxes iti ruar ti opisina a pagitinnagan dagiti kliyente iti kayatda a damagen ken kalaksidan iti dayta ket adda ti hotline wenno numero a mabalinda a tumawagan.
