Nasuspenso ti klase iti amin a lebel iti pampubliko ken pribado a pagadalan iti probinsia ti Ilocos Sur gapu iti 5.5 magnitude a gingined.
Alas dyes trenta y otso itay agsapa, nairekord ti Philippine Institute of Volcanology and Seismology iti nasao a kapigsa ti gingined a nagsentro iti 21 km abagatan a laud ti Pasuquin, Ilocos Norte.
Narikna ti kapigsana kadagiti sumagmamano a paset iti rehion uno ken iti Cordillera Administrative Region.
Iti pannaki-uman ti Bombo Radyo Vigan ken ni Acting Governor Ryan Singson, naipatungpal ti addang gapu ta kaaduan nga estudiante ket nakarikna iti narigat a panaganges.
Impasigurado ni Singson nga awan pay ti nairekord a nadadael a sanikua iti probinsia uray no narikna ti Intensity V iti Vigan City ngem agtultuloy ti assessment-da.
