Naideklarar ti suspension ti klase iti amin a lebel ti public ken private schools ken trabaho iti pampubliko nga opisina iti probinsia nga Ilocos Sur inton August 15, 2025 kagiddan ti selebrasyon ti deklarasyon iti Archdiocesan Shrine and Parish Church iti Our Lady of the Assumption idiay Sta. Maria kas Minor Basilica.
Ti addang ket babaen ti inruar nga Executive Order No. 18 Series of 2025 a pinirmaan ni Governor Jeremias “Jerry” Singson.
Opisyal a naipaay ti titulo a Minor Basilica iti nasao a simbaan ti Holy See babaen ti Dicastery for Divine Worship and the Discipline of the Sacraments kas panangbigbig iti exceptional religious, historical ken cultural significance.
Ti pormal a deklarasyon iti simbaan kas Minor Basilica ket maisayangkat inton bigat kagiddan ti Feast of the Assumption of the Blessed Virgin Mary nga idauluan ni Most Rev. Charles Brown nga Apostolic Nuncio to the Philippines kaduana dagiti church leaders, government officials ken ti agpammati iti intero a pagilian.
Immunan nga inrekomendar ti Provincial Disaster Risk Reduction and Management Office (PDRRMO) ti suspension iti klase ken trabaho kadagiti pampubliko nga opisina tapno mamanehar iti trapiko, masigurado ti kinatalged iti publiko ken makipaset dagiti agindeg ken masuportaran ti event.
Nupay kasta amin nga opisina ken ahensya a karaman iti disaster response, health services, emergency operations, public safety, peace and order, ken dadduma pay nga essential services ket agtultuloy latta iti trabahoda tapno saan a mariribok iti pannakaipaay ti serbisyo publiko.
Iti biang ti private business establishments ken offices ket nakadependen iti management-da iti suspension ti trabaho kas mayataday iti Department of Labor and Employment Labor Advisory No. 17, series of 2022.
