Kinatao ti rurog a nakali idiay kabanbantayan ti Lidlidda, addan paglawlawagan na

VIGAN CITY – Kinumpirmaran ni Police Lt. Nilo Domingo, mangidaulo ti Philippine National Police – Crime Laboratory idiay Candon City a babai ti kinatao ti rurog a nakali idiay kabanbantayan a paset ti Barangay Poblacion Norte, Lidlidda idi November 28.

Malaksid iti dayta, rimuwar pay iti eksaminasyon a dimmalanan ti nasao a rurog a mapatta-patta nga agtawen ti sangapulo ket pito agpangato iti tawen na.

Segun ken ni Domingo, naidalan iti nasao a rurog iti Odontological examination idi December 10 ket nakita da nga adu ti rukkapi ken binukbok a ngipen na ngem awan pulos iti dental record na nga isu kuma pay iti pakabigbigan nu siasino ti akin-rurog iti nakali idiay Lidlidda.

Immun-unan a kinumpirmaran ti PNP Crime Laboratory a ti nakali a rurog ket biktima ti pannagbat agsipud ta adda iti dunor iti lapayag, bukot ken ulo na kasta pay a nablo iti panga na.

No adda iti mapan mangbigbig ti rurog nga akin-pamilia ket maidalan iti DNA test tapno makita no agtugmada iti rurog a nasarakan.