Impabasol ti Makabayan Bloc iti krisis ken kinarigat a saan a matignayan ti administrasyon ni Pres. Ferdinand Marcos Jr. dagiti mapaspasamak a krimen kas iti panagtakaw.
Segun ken ni Kabataan party-list Rep. Renee Co, no kitaen ti pagtataudan ti isu no apay nga adda krimen ket gapu iti krisis iti kagimongan, ta agrigrigat dagiti Pilipino, awanen iti makan, awan ti paggatang iti taraon wenno agbisbisin dagiti pamilia gapu iti nangina a presyo dagiti magatang.
Gapu dayta ket kiniddaw ni Co iti gobierno a kitaen iti nasao a parikot imbes a nayunan laeng dagiti puersa ti polis kadagiti kalsada, pagadalan ken adu iti taona a lugar.
Inanamungan met dayta ni Gabriela party-list Rep. Sarah Elago ta patienna a saan nga agtakaw ti tao no adda laeng ti trabaho ken maikalintegan ti sueldoda ken adda magatang a taraon iti nalaka a gatad.
