VIGAN CITY – Inyunay-unay ni Dr. Glenda Rabino ita a maselselebraran ti Food Safety Awareness Week manipud October 25-31 ti kinapateg iti panangsigurado iti panangannad kadagiti taraon a maipapauneg tapno maliklikan dagiti dakes nga epektona kas ti food poisoning.
Iti pannaki-uman ti Bombo Radyo Vigan ken ni Dr. Rabino, adda dagiti wagas a masapul a kanayon a lagipen tapno maliklikan ti pannaka-kontamina dagiti taraon kas ti panangbuggo iti ima iti las-ud ti duapulo a segundo sakbay nga iggaman no isagana dagiti taraon.
Malaksid a nadalus dagiti ima, masapul a nadalus met laeng dagiti mausar iti panangsagana kadagiti taraon kas dagiti landek ken kutsilyo kasta payen nga ilasin dagiti dry food manipud iti wet food tapno maliklikan ti contamination ken ti pannakaikabil dagiti bakterya.
Uray no presko dagiti nateng ken prutas ket nalaokan met latta iti fertilizer isu a masapul a mabugwan babaen iti running water, saan ket a tay na-stock a danum.
Dua nga oras kalpasan ti pannakaluto dagiti taraon ket masapul a makonsumon gapu ta nadaras a kumapet ti bakterya – mabalin met nga i-freezer ngem maibalbalakad a maminsan laeng ti pannakai-reheat-na ta uray no maikabil iti refrigerator ket posible latta a makontaminado.
Nagpalagip ni Dr. Rabino a nasken ket masurot dagiti nasao a protocol tapno maliklikan a tumaud ti nadumaduma a sakit kas ti sakit ti tyan, panagbakwar, panagibleng ken ti cholera a mabalin a pakatayan no mabaybay-an.
