VIGAN CITY-Patien ni Abra lone district congressman JB Bernos nga agbutengan dagiti kriminal gapu iti napartak a pannakasolbar iti pannakapapatay ni Ako-Bicol partylist Rep. Rodel Batocabe kalpasan nga inbutaktak ni PNP chief director general Oscar Albayalde ti maatap nga utek ti krimen ket ni Daraga, Albay Mayor Carlwyn Baldo.
Ti exclusive interview ti Bombo Radyo Vigan kenni Bernos a maysa kadagiti nangidonar ti reward money para iti pannakakemmeg ti suspek iti krimen, kinunana a gapu iti kinaagresibo ti PNP ket agpangaddua dagiti kriminal nga agaramid ti maikaniwas ta uray no sadino ti paglemmengan da ket saan da a malibasan ti ima ti linteg.
Inaig iti dayta ket nakipagrikna ni Bernos iti pamilya Batocabe ta ammo na ti sakit ti maawanan ti ay-ayaten iti biag ta ti kabsat na idi a ni dati a La Paz mayor Mark Israel Bernos ket napapatay met laeng babaen kadagiti maatap a kalaban da iti pulitiko
Para met kenni Isabela congressman Rodito Albano , inpabaklay na kadagiti otoridad ti imbestigasyon ti nasao a kaso ngem no mapaneknekan a pudno dagiti impormasyon nga inbutaktak ti PNP ket dayta ti pakakitaan ti narugit a laban iti pulitika a saan kuma a rumbeng a mapasamak ta saan a kasapulan ti pumatay no sinsero ti maysa a tao nga agserbi iti publiko.
