Kinondenar ti Kilusang Mayo Uno ti saan a pannakaaprubar ti maisingsingasing a P200 wage hike bill.
Iti pannaki-uman ti Bombo Radyo ken ni Secretary General Jerome Adonis, makapungtot dagiti mangmangged ken nasakit ti nakemda ta nabayagdan nga ilablaban ti nayon a sueldo ngem patayen laeng ti 19th Congress gapu kadagiti adu a rasonda.
Numan pay adayo daytoy iti makuna a living wage para iti maysa a pamilia, ket makaited koma met daytoy itibassit a paglag-anan iti nangina latta a presyo dagiti magatang.
Maladingitan ti grupo gapu ta saan pay laeng a nai-transmit ti Kongreso ti gakat idiay Senado ket nangiruaren iti statement ti Office of the President ken ti sibubukel nga economic cluster a saanda a kayat a manayonan ti sueldo dagiti mangmangged.
Uray pay ibaga ti Malakanyang a saan a kontra ni Presidente Ferdinand Marcos Jr iti nayon a sueldo ket patienda a nalawag kadagiti addangda a saanda a kayat ti nasao a gakat.
Impasiguradoda a saanda a sumardeng a mangilaban iti ammoda a nainkalintegan ken husto para kadagiti mangmangged.
