VIGAN CITY – Patien ni Dindi Tan, kaunaan a transgender a nadutukan a kas director iti Department of Agrarian Reform ken dati nga assistant program manager iti nasao nga ahensia a saan nga ibasar ni Presidente Rodrigo Duterte iti gender ti maysa a tao no panagserbi iti pagilian iti mapagpapatangan.
Ti pannaki-uman ti Bombo Radyo Vigan ken ni Tan a taga Sta. Maria, nadakamatna a ti pakakitaan ti panagserbi ti maysa a tao ket saan a ti gender no di ket iti laing, talento ken ayat ti maysa a tao nga agserbi para iti pagsayaatan ti pagilian.
Innayonna pay a babaen iti panangipatugaw ti presidente kenkuana iti nasao a pwesto ket maisardeng dagiti aniaman a diskriminasyon a mapaspasaran iti LGBTQ community, maaddaanda iti karbengan ken maipakita ti gobierno a suportaranda iti pannakaipaay iti patas a panangtrato kadakuada.
Inkari ni Tan a ti panagserbina a kas director iti nasao nga ahensia ket ipaayan na dagiti mannalon iti pagsayaatan da ken livelihood program para kadagiti mapili nga agrarian reform beneficiary.
