VIGAN CITY-Nakaragsakan dagiti Overseas Filipino Worker iti panagbisita ni Presidente Rodrigo Duterte idiay Saudi Arabia.
Itay parbangon ket nakasangpet ti presidente iti nasao a pagilian para iti state visit na.
Segun kenni Priscilla Mangosing, dentist staff iti King Saud Medical City, College of Dentristry idiay Riyadh ken tubo ti Sanchez Mira , Cagayan, naragsak isuna agsipud ta adda iti presidente a mangipatpateg kadagiti OFW ken iti kontribusyon da iti ekonomiya iti pagilian .
Positibo met ti reaksyon ni Barbara Pacris Maramag, nurse idiay Saudi Arabia, iti naituding a pannakaperma ti katulagan iti nagbaetan ti Saudi ken Pilipinas para iti pannakasalaknib dagiti OFW.
Para kenkuana, napateg daytoy ta ado kadagiti OFW nangruna dagiti domestic helper iti ab-abusuen ti amo da idinto a sumagmamano kadagiti trabahador ti construction company iti saan pay a nagsweldo gapu iti pannakalugi dagiti kompanya.
Inton Miyerkules ket makasango ni Duterte iti Filipino Community idiay Saudi sakbay nga agturong idiay Kingdom of Bahrain.
