VIGAN CITY – Addan ti kaso ti Omicron variant iti Ilocos Sur kas pinasingkedan ni Ilocos Sur Provincial Hospital Gabriela Silang Chief Dra. Trina Tabboga Talaga.
Iti eksklusibo a pannakipatpatang kenni Dr. Talaga, idi laeng naminsan a nakaawatda ti pakaammo iti Department of Health nga addan ti kaso ti omicron iti probinsia ngem naduktalan pay laeng iti kaso idi maudi a lawas ti Disyembre 2021.
Ti pasyente ket naggapu iti ili ti Quirino ket mapapati a naalana ti virus kadagiti health facility a naggappuanna gapu ta maibilang isuna kas dialysis patient.
Inlawlawag ti doktor a dagiti kaso ti virus iti baba a paset ti probinsia ket saan a konektado iti pasyente ken inyunay-unay na nga ad-adu latta ti kaso ti delta variant wenno dadduma a variant of concern nu iyarig ti kaso ti omicron.
Patienna a dakkel ti tulong iti bakuna a naawat dagiti umili ta kaaduan kadagiti nagpositibo ket makapaspasar laeng ti mild symptoms isu nga allukuyenna ti publiko nga agannad kontra ti virus ken agaramat ti double facemask tapno maliklikan ti covid19.
