VIGAN CITY – Inton Lunes July 4, 2022 a maipila iti kaso ni Christler Subido, agtawen iti sangapulo ket walo a taga-Brgy. Magsaysay District, Santa gapu iti panangkabilna idiay Brgy. District Santa ti maysa a babai nga agtawen iti sangapulo ket pito a taga-Brgy. Pasungol iti nasao nga ili.
Segun ken ni PLt. Joseph Fieldad iti Santa Municipal Police Station, physical injury iti sangwen ti suspek ngem ibasarda latta iti medico legal iti ipilada ta nu bassit iti period of recovery ti biktima ket maibaba iti kasona.
Adda iti saanda a nagkikinnaawatan a gappuanan ti panangkabil ti suspek iti biktima ket uray inanawan dagiti kakadua ti biktima ket intuloy latta ti suspek iti panangdangranna ti menor de edad.
Gapu ti dayta, nagpalagip ni Fieldad kadagiti umili a nu adda parikot iti sabali a tao ket nasaysayaatda nu kasaritada laengen a nasayaat tapno awan iti pagbabawianda.
Nagkiddaw pay ti tulong kadagiti nagannak a bagbagaanda a nalaing dagiti annakda tapno saanda nga agaramid iti maikaniwas ken saanda a madangran ti padada.
