Nakadependen iti Ombudsman no kaano a mapilaan iti kaso ni dati a House Speaker Martin Romualdez.
Dayta ti sungbat ni Presidente Ferdinand Marcos Jr kalpasan a masaludsod iti maysa a forum no kaano a makita ti publiko a maidarum ni Romualdez iti kaso a plunder, graft and corruption, direct bribery, ken money laundering.
Segun iti Presidente, ti Ombudsman ti mangim-imbestigar ken ni Romualdez ken awan ti impormasionna iti detalye dagiti ar-aramiden a tignay ti opisina ni Ombudsman Jesus Crispin Remulla.
Innayon ni Marcos a tawaganna ni Remulla tapno komustaen ti maisaysayangkat nga imbestigasion ken ni Romualdez.
Binilin ti Ombudsman ni Romualdez ken dadduma pay a respondent iti counter-affidavit iti uneg ti 15 nga aldaw kasaruno ti reklamo a naipila a supplemental complaint affidavit idi Hulyo 20.
