VIGAN CITY – Maisagsaganan ti kaso kontra kadagiti uppat a lallaki a nangkabil ti kalugaranda idiay Brgy. Allangigan Primero, Candon City.
Segun ti Candon City Police Station, ti biktima ket ni Luisito Cortez Delos Santos, agtawen ti limapulo ket tallo, naasawaan, construction worker idinto a dagiti suspek ket da Rodolfo Cortez, agtawen ti limapulo ket dua, naasawaan, mannalon; Dexter Valdez Cortez, agtawen ti duapulo ket innem; Lester Valdez Cortez, agtawen ti duapulo ket innem; ken Rany Cortez Valdez, agtawen ti innem a pulo ket dua, naasawaan, awanan trabaho nga agpapada nga agnaed idiay Brgy. Allangigan Primero, Candon City.
Nagturong ti biktima a ni Luisito iti Candon City Police Station ket impresentarna iti Certification to File Action a pinirmaan ni George Galcon a Pangkat Chairman iti nasao a lugar a napetsaan idi April 22, 2023 nga adda Barangay Case number a 2023-09 inaig iti insidente a napasamak idi April 5, 2023 iti alas kuatro iti malem iti nasao a lugar gapu iti panangkabil kenkuana dagiti suspek.
Segun ti biktima, bayat ti kaaddana iti construction site iti karrubada ket dandani kinagat isuna ti aso ni Rodolfo Cortez ta nakamat isu a naibagana ken ni Dexter Cortez a rumbeng a maigalot ti asoda.
Kalpasanna, idi nakita pay ti biktima ni Rodolfo Cortez ket binagaanna met laeng nga igalotda iti asoda, ngem nangpidot iti bato da Dexter, Lester ken Rany ket nagturongda iti ayanna, idin tinenggel ni Rany ket indanog ni Dexter ti bato iti akin-kannigid a mata ti biktima idinto a pinungot met ni Lester.
Naipan ti biktima iti St. Martin De Porres Hospital kaduana ti asawana para iti medical treatment.
