VIGAN CITY – Kaso a theft ti sangwen da Arturo Baloro Sumalinog, agtawen iti tallopulo ket lima, baro, tubo idiay Mandaue, Cebu City ngem agdama nga agnanaed idiay Zone 4, Bantay; ken Kevin Idica Vergara a taga-Tondo Manila gapu iti panagtakawda iti Simbaan a Bassit idiay Barangay 8, Vigan City, Ilocos Sur.
Segun ti Vigan City Police Station, mainaig iti insidente idi May 9, 2024 nga impa-blotter ni Fr. Gary Somera Formoso, agtawen iti limapulo ket tallo a parish priest iti St. Paul Metropolitan Cathedral ngem agdama nga agnaed iti isu met la nga establishyimento ket kinunana a nakasagana a mangipila iti kaso kadagiti suspek a nabigbig babaen ti tignay iti Vigan City Police Station.
Impakammo dagiti nakaimatang a binitbit dagiti suspek ti donation box iti nasao a simbaan a nagna ti kamposanto isu a pinakaammoanda ti caretaker iti simbaan.
Idi umun-una ket saandan a kayat nga agipila ti kaso ngem idi nabigbig dagiti suspek ket sisasaganadan a mangipila iti kaso.
