Maisagsaganan ti kaso a Qualified Theft iti maysa a babai a tinakawanna ti amona idiay Barangay Tablac, Candon City, Ilocos Sur.
Nabigbig ti suspek a ni Maryjean Orabis Dalumos, agtawen iti duapulo ket uppat, naasawaan, tubo idiay Barangay Balongisan, Payao, Zamboanga Sibugay ngem agdama nga agnaed idiay Barangay Cabaroan, Sta. Maria.
Ti met biktima ket ni Edwina Ignacio Arzadon, agtawen iti innem a pulo ket maysa, naasawaan, negosyante nga agnaed idiay Barangay Tablac, Candon City.
Iti pannaki-uman ti Bombo Radyo Vigan ken ni PLT. Jovelyn Antalan manipud iti Candon City Police Station, nagdesisyonen ti biktima a pilaan iti kaso ti suspek gapu ta saan a sumungsungbat kadakuada kalpasan a mapatulodan iti notice tapno mapagsaritaanda koma ti panagtakawna kenkuana.
Maipalagip nga idi February 3, 2025 iti alas otso iti bigat ket mapukpukaw ti puraw nga envelope ti biktima a naglaon iti P50,000 a daytoy ket naiparabaw iti vanity table-na.
Kinomprontar ti biktima ni Marijie Torilla Lacastesantos a witness ken katulong met laeng ti biktima ket idi sinaludsodna, kinunana a nga idi agisana iti pangrabiida idi February 2, 2025 iti alas otso iti rabii ket saannan a nakita ti suspek isu napanna sinapul iti 2nd floor iti pagtaengan ngem idi nakadanon iti terasa, nakitana ti suspek a rimmuar iti tawa ti kuarto ti biktima nga adda iggemna a puraw a sobre.
Saan nga impagarup ti witness nga adda inaramid ti suspek iti kuarto isu nga inayabanna a nangan ngem idi bimmaba ti witness ket napansinna a saan a simmurot ti suspek isu a napanna manen kinita iti pagipapanan ti suspek iti lupotna ket natakuatanna nga awanen dagiti alikamenna.
Gapu dayta ket napanna kinita iti sango a paset ti gate iti pagtaengan ti biktima ket isun ti pannakakitana a nakalukat ket patienna a naglibas ti suspek idi maitaraynan ti kuarta.
