VIGAN CITY – Kaso a parricide ti maipila a kaso kontra ken ni Alfredo Paliko Agusen, agtawen iti pitopulo ket maysa a nangpapatay babaen ti panangbagkongna iti asawana a ni Nora Ricardo Agusen, agtawen iti innem a pulo ket innem idiay Barangay Tiagan, San Emilio.
Iti pannaki-uman ti Bombo Radyo Vigan ken ni Police Captain Joseph Bantullay iti San Emilio Police Station, nabayag a nagsina ken saan nga agdendennan dagiti agassawa ket kayat ti suspek nga agsinnubliananda ngem saanen a kayat ti biktima.
Timmultulong pay ti barangay iti pannakaurnos koma ti saan a pagkinnaawatan dagiti agassawa ken uray dagiti uppat nga annakda.
Nakainom iti arak ti suspek idi sinurotna ti biktima nga agawid koma ta adda naggapuanna ket idi nasurotna, tumaray koma met ti biktima ngem nabagkong isunan ti suspek.
Kabayatanna, natakuatan pay a masansan ti panagbalin a naranggas ti suspek no makainom ngem gapu ta awan ti tao iti kanito a napasamak ti pammagkong ket awan ti nakaigawid iti suspek.
