VIGAN CITY – Kaso a murder ti maipila kontra ken ni Glorioso Jeff Suyat Cauton, agtawen iti tallopulo ket walo, agnaed iti Barangay Poblacion Sur, Sta. Cruz gapu ti panangpaltogna ken ni Patrick Santos Abdon, agtawen iti uppat a pulo ket dua, agnaed iti Barangay Sevilla, iti nasao nga ili.
Iti pannaki-uman ti Bombo Radyo Vigan ken ni Police Captain Paul Vinsent Tadeo, adda kadakuadan ti affidavit ti witness ken dadduma a dokumento a kasapulan para ti pannakaipila iti kaso.
Kabayatanna, inlanad ni Tadeo a sakbay ti pasamak ket naginom ti biktima ken ti witness idin ta nagpakuyog ti biktima a gumatang pay ti nayun nga inumenda.
Ket idi mapanda gumatang, nagpakadua ti biktima iti witness a mapanda iti balay ti gayyemna nga isu ti suspek.
Dimsaag ti biktima manipud iti naglugananda ket nabati ti witness iti uneg agingga idi mangngeganna nga adda lima a putok iti paltog ket nakitana a naidaleb ti biktima, isu a dagus met a pinatarayna ti lugan gapu ti danagna.
Sakbay pay dayta ket kinalay-at ti biktima nga agprob-probokar ti gate ti pagtaengan ti suspek agingga a rimuar met ti suspek a nangpaltog iti biktima.
Iti agdama, agtultuloy met ti panangsapul dagiti pannakabagi ti linteg iti paltog a naaramat.
