Kinumpirmaran ti Department of Justice a maidalan iti preliminary investigation dagiti kaso a naipila iti estudyante a nagpaltog iti pagadalan idiay Tacloban City.
Segun mismo ken ni DOJ Usec. Ian Norman E. Dato, maisayangkaten ti preliminary investigation ti reklamo a naipila kontra iti agtawen iti sangapulo ket lima a karaman iti pammaltog.
Maipalagip a nakasoan ti nasao nga estudyante iti tallo a bilang ti murder ken dua a bilang ti attempted murder kalpasan a napasamak iti pammaltog iti pagadalan.
Kasaruno iti inquest proceedings iti Tacloban City Prosecutor’s ket maipanen iti preliminary investigation ti prosecution dagiti reklamo.
Maibilang ti estudyante a nagpaltog iti Tacloban City kas children in conflict with the law nga agdama nga agtaltalinaed iti kustodiya iti Regional Rehabilitation Center for Youth iti Region VIII.
Ti met agtawen iti sangapulo ket uppat a karaman iti pammaltog ket addan iti pannarabay iti Department of Social Welfare and Development a nakaidalanan iti intervention programs iti ahensia.
