VIGAN CITY – In-inuten nga agsubli iti normal a kasasaad ti Thailand ta bassiten dagiti kaso iti COVID19 agsipud ta natulnog dagiti agindeg kas pinasingkedan ni Bombo International Correspondent Crizel Zabala, taga- Brgy. Cubcubbuot, Candon City maysa a mangisursuro iti pannaki-uman kenkuana ti Bombo Radyo Vigan.
Segun ken ni Zabala, sursuroten amin dagiti agindeg dagiti naiyetnag a pagannurotan kas ti panagaramat ti facemask nangruna no rumuar ken no sumrek kadagiti establisimento kasta payen iti panagtulnogda iti curfew hour ta no adda dagiti aglabsing ket mamueltada.
Kabayatanna, inton July 1 ti manamnama a panagsubli ti trabahoda kalpasan iti pannakaisarra dagiti pagadalan ken nadumaduma nga establisimento tapno maliklikan iti panagraira iti nasao a sakit ngem dagiti dadduma ket mangisaysayangkatda iti online class para kadagiti estudiante.
Inyunay-unayna met nga aktibo latta ti Filipino community a tumulong kadagiti kailianda ta isuda ti mangipapaay ti relief goods kadakauda ken kangrunaan kadagiti naapektaran iti “no work, no pay”.
