VIGAN CITY – Naikalin dagiti karne iti baboy a nasurok kumurang maysa a tonelada a naikabil iti uneg ti drum a nailugan ti maysa a puraw a van a nasalamaan dagiti kameng ti provincial quarantine office idiay Bio, Tagudin idi Enero 27.
Sakbay iti pannakaikali dagiti karne iti baboy ket nauram pay dagitoy pakairamanan dagiti drum a nakaikabilan da ti karne ket idi inbelleng da, adda pay nakitada a tsinelas ti ubing a mangipasimudaag a saan a nadalus dagiti karne a naggapu idiay Bulacan a maipan kuma idiay Abra.
Mapilaan iti kaso a panaglabsing iti Section 4, Presidential Decree 1506 series of 2015 ken panaglabsing ti Executive no. 24 series of 2019 wenno iti temporary ban of pork meat products ditoy probinsia ti nagmaneho iti van.
Immunan a kiniddaw ni Provincial Quarantine Officer Martel Quitoriano a masapol a paingetan idiay probinsiya ti La Union ken Pangasinan tapno maliklikan iti pannakailibas dagiti produkto a maiparit a maiserrek ditoy probinsiya gapu iti pangta ti African Swine Fever virus.
