Impaganetget ni Annabelle Polanco iti DTI-Ilocos Sur ti kinapateg a masalwadan ti karbengan dagiti konsyumer nangruna ita a bulan a marambakan ti Consumer Welfare Awareness Month a ti temana ket “Be Smart, Assert your Consumer Rights!”.
Iti pannaki-uman ti Bombo Radyo Vigan ken ni Polanco, ita a marambakan manen ti nasao a selebrasyon ket napateg a maipasapgsep ti karbengan dagiti konsyumer kas iti nasken a kasapulan iti panagbiag, kinatalged, impormasion, panagpili, pannakaibagi, panagireklamo, edukasion para iti konsyumer ken ti nasayaat nga aglawlaw.
Impasigurado ni Polanco nga iti biang ti DTI ket ar-aramidenda amin a wagas tapno masalwadan ti karbengan dagiti konsyumer tapno mayadayoda iti pannakaallilaw ken kadagiti uncertified product.
Nupay kasta, binalakadanna dagiti konsyumer nga agalibtak, agridam, agsukisok kadagiti gatangen a produkto, saan nga agbuteng nga agdamag ken siguradoen a sakbay a bayadan ket isu ti produkto a gatangen.
