Napagtulagan dagiti dua a drayber a karaman iti aksidente a napasamak idiay Brgy. Becques, Tagudin a kanya-kanya da iti gastos ti panagpa-ospital ken panagpasimpa iti lugan.
Nabigbig ti nagmaneho ti Honda TMX tricycle (kurong-kurong) a ni Fernando Garcia Jr., agtawen iti uppat a pulo ket tallo, ken kaduana ti putot na a babai nga agtawen iti uppat nga agpada a residente ti Brgy. Gabur, Sta Cruz, Ilocos Sur.
Ti met drayber ti Honda XRM 125 motorcycle ket ni Arjay Oblero Camat, agtawen iti duapulo ket dua, single, collector, ken residente ti Pagleddegan, Balaoan, La Union.
Iti pannaki-uman ti Bombo Radyo Vigan kenni PMAJ Kleyvan Paycao Dalang, OIC ti Tagudin Municipal Police Station, agpada a nakabasol dagiti dua a drayber, ngem agpadada a saan a nakainom ti arak.
Napasamak ti aksidente idi kellaat a nagsardeng ti kurong kurong bayat ti panagdaliasatna nga agpaamianan, isu a natukbob ti motorsiklo iti luganna.
Gapu iti impact na, natumba ti motorsiklo iti kalasada, idinto a natnag ti traysikel iti irrigation canal.
Segun kenni PMAJ Dalang, nagsagaba dagiti karaman ti aksidente iti dunor ti nadumaduma a paset ti bagida, ken awan iti napakarwan ti napasamak nga aksidente.
Kabayatanna, naticketan ti drayber ti motorsiklo gapu ta student permit laeng ti lisensiya na.
