VIGAN CITY – Agtultuloy ti panangbambantay dagiti kameng ti Narvacan Municipal Police Station kagiddan ti panagpiesta ti nasao nga ili.
Iti pannaki-uman ti Bombo Radyo Vigan ken ni Police Major Arcadio Viloria, rinabii sipud pay nangrugi ti night market idi November 18 ket nakabantayen dagiti kamengda iti Narvacan Farmers Market para ti seguridad dagiti adu a tattao.
No adda met makitada a nabarbartek ket kapatangda ida nga agawid laengen tapno saan nga isuda ti mangitunda iti riri iti nasao a lugar.
Malaksid dayta, mangisaysayangkatda pay met iti OPLAN SITA wenno ti panangkitada iti bag dagiti tattao a mapmapan no awan met laeng dagiti patadem nga ikotda.
Nupay kasta, innayon ni Arcadio a nalaing met a makitinnulong dagiti umili isu a nakapia ti inda panagbambantay ken awan dagiti rinespondeanda pay a madi a pasamak.
