VIGAN CITY – Ibilang ni Barangay Captain Julio George Apongol ti Brgy. Sapriana, Sinait a baro a biag ti naited kenkuana ta nakalasat ti pammaltog kenkuana.
Iti pannaki-uman ti Bombo Radyo Vigan kenni Apongol, burburtia kenkuana iti napasamak a pammaltog ta awan iti napalabas a nakariri na wenno napasaktanna bayat iti panagtakem na kas ama ti barangay.
Saan nga ikkaten ti kapitan a posible nga adda iti pakainaigan ti pulitika iti napasamak kenkuana ta asideg manen iti panagpipili ken kas kinunana awan iti nakaririna.
Segun kenni PMaj. Jomar Andres, hepe ti Sinait PNP, rimmuar ti imbestigasyon da a posible a nagpaputok ti gunman bayat iti panagdalyasat ti biktima ken amangan a butbutngenda laeng ngem saan da nga ikkaten dagiti dadduma nga angulo iti panangsulbar ti napasamak a pammaltog.
Nagpalagip ni Andres nga agbalin a naridam dagiti umili kadagiti paspasamak ti aglawlaw da ken ipakammuda kadagiti otoridad no adda dagiti madmadlaw da a naidumduma.
