VIGAN CITY – Saan nga ilaklaksid dagiti pannakabagi ti linteg iti Magsingal Police Station iti imbestigasyonda ti panagbalin a sentensyador iti galyeraan ti biktima iti pammaltog idiay Panay Norte, Magsingal a ni Barangay Captain Lawrence Guillen Angco, agtawen iti innem a pulo ket lima, agnaed iti Barangay Poblacion, Sto. Domingo
Iti pannaki-uman ti Bombo Radyo Vigan ken ni Police Captain Rodel Ragasa, malaksid iti panagbalin a sentensyador ti biktima ket maysa pay kadagiti kitkitaenda a posible a motibo ti pannakainaigna iti pulitika.
Maipalagip a napaltugan ti biktima a puon ti nakatayanna kabayatan ti panagmanehona iti motorsiklo a rumuar manipud iti galyeraan.
Nagsagrap iti innem a tama iti paltog ti nadumaduma a paset ti bagi ti biktima, saggaysa iti barukong, kili-kili, akin-kannawan nga ima, bukot ken saka.
Kalpasan dayta, naglibas ti suspek a nagpa-abagatan a direksyon idinto a naitaray iti ospital ti biktima ngem naideklarar a dead on arrival.
Nupay kasta, agtultuloy met ti panagimbestigar dagiti pannakabagi ti linteg no ania ti motibo iti napasamak ken no siasino ti suspek.
