VIGAN CITY- Saan a nakaapektar iti pannakairaman ti nagan na iti drug list ti Philippine Drug Enforcement Agency (PDEA) iti panagpailayon ni Poblacion, Sta. Catalina Barangay Chairman Chris Conrad Navarro gapu ta nangabak iti kailepleppas na laeng a Barangay ken Sangguniang Kabataan elections babaen iti landslide votes.
Maibasar iti final ken unofficial tally ket nangabak ni Navarro kas kapitan iti nasao a barangay babaen iti botos a lima gasut pito pulo kontra iti kinarinnisiris na a ni retired PNP member Manuel Viaje a nakaala iti tallo gasut uppat a pulo ket innem a botos.
Ni Navarro iti kakaisuna a barangay chairman ti Ilocos Sur a nairaman iti narco-list nga inparuwar ti PDEA, sabali laeng dagiti tallo pay a barangay kagawad manipud iti naduma-duma a barangay iti probinsiya.
