Natay dagiti agama iti pammaltog a napasamak idiay Barangay Lapting, San Juan, Ilocos Sur itay alas syete dies iti rabii.
Dagiti biktima ket da Barangay Captain Bello Joseph Padua Valorozo, agtawen iti limapulo ket dua ken putotna a ni Jumar Sotelo Valorozo, agtawen iti duapulo ket uppat, baro, mannalon nga agpada nga agnaed idiay Barangay Caronoan, San Juan, Ilocos Sur idinto a saan a nabigbig dagiti suspek.
Nakaawat ti report iti San Juan Municipal Police Station iti napasamak a pammaltog iti national highway iti nasao a lugar isu a nagrespondeda ket naamoan a bayat a nakalugan dagiti biktima iti Mitsubishi MV 100 van ket pinaltogan dagiti saan a nabigbig a suspek a nakamotorsiklo.
Agpada a nagsagaba iti gunshot wounds iti nadumaduma a paset iti bagi dagiti biktima ket ni Kapitan Bello ket naipan iti Suero General Hospital, Cabugao ngem naideklarar a natay idinto a ti putotna a ni Jumar ket naipan iti Pira Hospital, Cabugao ken naiyakar iti Northside Doctors Hospital, Bantay ngem napimmusay bayat a matamtaming.
Insigida a nakikammayet dagiti kameng ti San Juan Police Station iti kaasidegda a Police Station para iti dragnet operation.
