VIGAN CITY – Nakasaganan iti probinsia para iti umadanin a Kannawidan Festival ta idi kalman ket naisayangkaten iti maudi a panagtataripnong dagiti opisial para kadagiti aktibidad a maisayangkat ken venue a mausar.
Ti nasao a taripnong ket inatendaran dagiti maseknan iti nasao a parambak nangruna dagiti mangimaton kadagiti nadumaduma nga aktibidad.
Dagiti venue a mausar para iti parambak itatta a tawen ket ti Kannawidan grounds ditoy Tamag, Vigan City ken dagiti dadduma pay nga ili kas idiay Bantay, Sta. Catalina ken Candon City.
Kabayatanna, segun ken ni Dr. Cesar Solier, organizer ti Rodeo competition ti Kannawidan festival, local competition laengen ti nasao nga event agsipud ta dagiti makisalip ket aggapu laengen ditoy probinsiya kas kadagiti aggapu idiay San Emilio, Vigan City, ken adda pay ti aggapu ti Ilocos Sur Community College ken Alumni Association.
Maisayangkat ti nasao nga aktibidad inton January 31 ken impasigurado ni Solier a no man pay awan dagiti makisalip nga aggapu kadagiti nadumaduma nga state universities and colleges ket naragsak latta agsipud ta adda dagiti kaprobinsiaan a makisalip.
