Impasigurado ni National Irrigation Administration (NIA) Administrator Eduardo Guillen nga umdas ti suplay ti danum kadagiti kangrunaan a dam iti pagilian tapno maipaay ti kasapulan kadagiti talon iti baet ti pangta ti El Niño.
Karaman ditoy ti Magat Dam iti Isabela nga agserserbi a kangrunaan a pagalaan ti danum iti 90,000 nga ektarya, Pantabangan Dam iti Nueva Ecija a mangsuporta iti 140,000 nga ektaria ti talon, ken San Roque Dam iti Pangasinan.
Ipangpangruna met ti Angat Dam ti NIA tapno masigurado ti umdas a suplay ti danum iti Metro Manila.
Kabayatanna, itantandudo ti ahensia dagiti solar-powered irrigation projects a nalaklaka ken naparpartak ti pannakaaramidda ngem kadagiti gagangay a proyekto ti irigasion.
No mapalubosanda met nga agilako iti sobra a kuryente a pataudenda, posible a makapastrek ti NIA iti ₱600 milion agingga iti ₱800 milion iti kada tawen.
