VIGAN CITY – Posible a dehado inton kaaldawan ti panagpipili dagiti kandidato nga awan unay ti pondo nga ususaren da iti panagkampanya da iti agdama, ditoy man local ken uray iti national level.
Segun ken ni University of the Philippines- National College of Public Administration (UP-NCPAG) Dean Dr. Maria Fe Mendoza iti interview ti Bombo Radyo Vigan kenkuana, saan unay nga am-ammo dagiti botante dagiti kandidato a saan da a makitkita ken mangmanggeg kadagiti advertisement iti radyo ken telebisyon iti nagan da.
Dayta iti rason a patien ni Mendoza nu apay a posible a marigatan dagiti nasao a kandidato a makaala iti botos dagiti tattao inton May 13.
Naibaga pay ti nasao a political analyst a dakkel iti epekto na dagiti survey a rumrumwar a domdominaran dagiti kandidato ti agdama nga administrasyon ti laban iti kina-senador.
