Impaganetget ti Malakanyang nga adda iti kampo ni Vice President Sara Duterte ti sungbat a mangted ti ebidensia maipanggep iti maibagbaga nga Operation Romanov a nadakamat a gappuanan ti panagsaritana kontra iti presidente.
Segun ken ni Palace Press Officer USec. Claire Castro, naikkanen iti gundaway ni VP Sara Duterte nga agipasa iti detalye kalpasan a pinatulodan ti surat ti NBI maipanggep ti mapapati a death threats kenkuana ken ti pamiliana ngem saan a simmungbat.
Kinuna ni Castro nga awan iti mabalin nga imbestigaran ti gobierno no awan ti umdas nga impormasyon wenno ebidensia a mangpaneknek iti maibagbaga nga operasyon.
Impaganetget ti Malakanyang a saan a maibilang a kalintegan ti Operation Romanov iti mapapati a panagpangta ti bise presidente iti presidente.
Innayonna nga aniaman a personal a takder ni Duterte kas ina wenno miembro ti pamilia, ti pangta ti biag ti presidente ket agtaltalinaed a seryoso a patangan.
