Nainget a kinontra ti defense team ni VP Sara Duterte ti panangusar ti prosecution iti balikas a “mastermind” ken “architect” iti impeachment trial, a maipagarup a dak-dakamaten na ti Vice President mainaig iti pannakaaramat ti confidential fund.
Kiniddaw ti depensa a maikkat dagiti kasta a sao iti opisial a rekord ken impalagipna iti prosekusion a liklikanda dagiti sarita a kas iti “scam” ken dadduma pay a nauneg nga alegasion tapno maliklikan ti pre-judgment ken mind-conditioning.
Immanamong ni Presiding Officer ken Senate President Francis “Chiz” Escudero iti mosion ti depensa ket binilinna ti prosekusion nga agusar kadagiti mayannatup ken maawat a sarita kadagiti sumaruno a panagdengngeg.
Kabayatanna, ti spokesperson ti depensa a ni Atty. Michael Poa ket pinasingkedanna nga adda bukod nga estratehia dagiti abogado iti korte, ngem namnamaenda nga agtalinaed a naurnos ken mayannatup ti panagsao ti agsumbangir a partido. Kleofe Jyna Dayag
