Immapela ti kampo ni dati a President Rodrigo Duterte iti International Criminal Court (ICC) kalpasan a pinagkedkedan ti Pre-Trial Chamber I iti kiddawda nga interim release wenno temporaryo a pannakawaya-waya.
Kinumpirmaran ti lead counsel ni Duterte a ni Atty. Nicholas Kaufman nga impilada ti apela iti napalabas a makalawas ken naawagan a madi iti pangngeddeng iti korte.
Iti nairuar a 23-pages a desisyon idi September 26, impaganetget iti ICC a kasapulan nga agtalinaed iti kustodiya ni Duterte tapno maliklikan a maapektaran ti imbestigasyon ken dagiti proseso.
Pinasingkedan pay ti korte a posible a flight risk isuna ken mabalin a makaapektar kadagiti testigo.
Pinaglibakan iti ICC iti argumento iti depensar a rumbeng a waya-wayaan ni Duterte gapu iti tawenna ken kasasaad iti salun-atna, ket kinunada nga adda umanay a serbisyo medical iti uneg iti ICC Detention Center.
Segun ti kampo ti dati a presidente, saan a mayannatup ni Duterte a sumango iti proceedings gapu iti cognitive decline, ngem kinuna dagiti Judge nga awan ti umanay nga ebidensya tapno mapaneknekan dayta.
