Pinasingkedan ni Bombo International News Correspondent Menen Maog iti California, USA nga agpada nga agresibo ti kampanya dagiti dua a kumankandidato iti kinapresidente idiay Amerika kagiddan ti umay a panagpipili.
Iti pannaki-uman ti Bombo Radyo Vigan ken ni Maog, ti laengen pagdumaan iti kampaniada ket no asino dagiti mamati iti fake news ken alternative media.
Innayonna a kinaulbod dagiti maipadpadamag a mapumpunno iti tao dagiti campaign rally ni Trump ta kagudwa laeng iti venue dagiti mapmapan no yarig ken ni Harris nga adu ti tao, naragsak ken positibo ti aglawlaw.
Kunana pay a ti kampanya ni Trump ket puro laeng pammutbuteng ken kinaublbod ti agpampannuray agsipud ta daytoy ti patienda a wagas a mangallukoy iti rikna dagiti agbotos.
Malaksid dayta, awan ti platapormada ken puro amin negatibo.
Nupay kasta, namnamaenna a malawlawagan ti panunot dagiti agbotos nangruna dagiti padana a Pilipino tapno mapreserba ti demokrasya.
