Imbutaktak ni Ramil Lagunoy Madriaga, mapapati a’bagman’ ni Vice President Sara Duterte, a POGO operators ken drug money ti nagtaudan ti pondo para iti kampania ti bise presidente idi 2021-2022.
Maibasar iti affidavit-na, isuna ti mapapati a timmulong a nangbukel iti grupo nga ISIP Pilipinas ken personal a nangipatulod iti dakkel a bag ken lugan a naglaon iti gatad manipud iti nadumaduma a lugar kas ti
Pampanga, Quezon City, BGC, Megamall, ken sumagmamano a pribado a pagtaengan idiay Novaliches.
Kunana nga idi nagtugaw ni Duterte kas Bise Presidente, naipaaramid kenkuana ti panangbukel iti Vice Presidential Security and Protection Group (VPSPG) ken nagtuloy ti pannakayar dagiti gatad basar iti pammilin dagiti dadduma nga opisial ken ti mapapati a pammilin ni VP Sara.
Awan pay ti sungbat ti Office of the Vice President ken dagiti tao a nadakamat iti affidavit mainaig iti daytoy nga alegasion.
