VIGAN CITY – Dead on the spot ti maysa a kameng ti Bureau of Fire Protection-San Juan ta pinaltugan dagiti dua a saan pay a nabigbig a suspek idiay Sitio Quillayan, Brgy. Lussoc, Sto. Domingo.
Nabigbig ti biktima a ni SFO1 Jerry Gampayon, agtawen iti uppat a pulo ket pito a taga-Brgy. Sagsagat, San Ildefonso.
Nakalugan ti biktima ken ti live-in partner-na, agtawen iti uppat a pulo iti motorsiklo ta napanda iti pagtaengan ni Roosvelt Pamo Tabangcura a kabsat ti live-in partner-na idiay Brgy. Lao-ingen, Sto. Domingo tapno bayadan ti manure ti baka.
Idi agawidda ket sabali ti ruta a dimmalanan ti biktima tapno yaw-awan dagiti mapapati a mangsursurot kadakuada idin ta nagsardeng ti biktima ket sinangatna dagiti dua a suspek a nakalugan iti NMAX motorcycle.
Gapu ti dayta, inyawat ti backrider ti suspek ti bay-ong a naglaon ti mapapati a shotgun ket imputokna iti akin-ngato a paset ti bukot ti biktima a puon ti nakatayanna.
Kalpasan ti pammaltog ket naglibas dagiti suspek ket insigida a nangiwayat dagiti pannakabagi ti linteg iti dragnet operation.
